Шууд Chart

СХД-ийн шинэ эмнэлэгт Шадар сайд очиж ажиллав

2021-04-12 13:36:21

Сонгинохайрхан дүүрэгт олон улсын стандартад нийцсэн 250 ортой, орчин үеийн иж бүрэн тоног төхөөрөмжөөр тоноглогдсон, дүүргийн иргэдэд оношлогоо, эмчилгээний үйлчилгээ үзүүлэх жишиг Нэгдсэн эмнэлэг ашиглалтад орсон.

Шадар сайд, УОК-ын дарга С.Амарсайхан, Эрүүл мэндийн сайд Л.Энхболдын хамт тус эмнэлгийн тоног төхөөрөмж, яаралтай тусламж үйлчилгээний бэлэн байдлыг шалгаж, газар дээр нь очиж ажиллав.

Тус эмнэлэг нь амбулаторийн 27 кабинеттэй, хэвтэн эмчлүүлэх долоон тасагтай бөгөөд мэс засал, дурангийн хагалгаа, хими, туяа зэрэг эмчилгээ хийх сүүлийн үеийн иж бүрэн тоноглогдсон өрөөтэй. Түүнчлэн дотор, хүүхэд, мэс засал, эх барих, эмэгтэйчүүд, шүд, мэдрэл, халдварт өвчин зэрэг үндсэн долоон мэргэжлийн тусламж үйлчилгээ үзүүлэх боломжтой аж.

Дүүргийн нэгдсэн эмнэлэг хуучин байрандаа ковидаар халдварласан иргэдийг эмчлэх 100 ор дэлгэж, өнөөдөр үүндээ 67 иргэнийг хэвтүүлэн эмчилж байгаа, цаашид шаардлагатай тохиолдолд тус эмнэлэгт халдвараар өвчилсөн иргэдийг хүлээн авах ор нэмж дэлгэх боломжтой гэдгийг тус эмнэлгийн дарга Б.Галсанцэдэн хэллээ.

СХД-ийн жишиг нэгдсэн эмнэлэгт хүчилтөрөгчийн баллоноор цэнэглэж, хүчилтөрөгчөөр хангах корпус ажилладаг бөгөөд хүндрэлтэй иргэдэд яаралтай тусламж үзүүлэх боломжтой юм. Одоогийн байдлаар тус дүүргийн эмнэлэг нь хүчин чадлынхаа 20-30 хувийг ашиглан үйл ажиллагаа явуулж байна.

Цаашид Хан-Уул болон Чингэлтэй дүүрэгт тус эмнэлэгтэй ижил жишиг эмнэлэг байгуулахаар төлөвлөж байгаа талаар Эрүүл мэндийн сайд С.Энхболд хэллээ гэж Монгол Улсын Шадар сайдын ажлын албанаас мэдээллээ.


СХД-ийн шинэ эмнэлэгт Шадар сайд очиж ажиллав  
Үзсэн: 804 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй