Шууд Chart

Олон улсын худалдааны асуудлаарх Ази, Номхон далайн орнуудын парламентчдын цахим семинар болж байна

2021-05-17 21:05:17

Улсын Их Хурлын гишүүн Х.Булгантуяа, Д.Цогтбаатар нар өнөөдөр (2021.05.17) Олон улсын худалдааны асуудлаарх Ази, Номхон далайн орнуудын парламентчдын цахим семинарт оролцлоо.

Гурван өдөр үргэлжлэх уг арга хэмжээг Дэлхийн худалдааны байгууллага болон Сингапур Улсын Ражаратнам олон улс судлалын сургуулиас зохион байгуулж байгаа бөгөөд Зүүн Өмнөд Азийн бүс нутгийн хамтын ажиллагааны нийгэмлэг (АСЕАН)-ийн гишүүн орон болон Ази, Номхон далайн орнуудын 40 гаруй парламентчид чуулж байна.

Бүс нутгийн хууль тогтоогчдыг нэгдсэн ойлголтоор хангах зорилготой уг семинараар Дэлхийн худалдааны байгууллага болоод олон улсын худалдааны өнөөгийн болон ойрын ирээдүйд хэрэгжих хэлэлцээрийн талаар дэлгэрэнгүй мэдээлэл солилцлоо.

Дэлхийн худалдааны байгууллагын Ерөнхий захирал Др. Нгози Оконжо-Ивиила, Ражаратнам олон улс судлалын сургуулийн дэд захирал, Элчин сайд Онг Кенг Ён нар мэндчилгээ дэвшүүлсэн бол Сингапур Улсын парламентын дарга Тан Чуан-Жин семинарыг нээж үг хэлэв.

“КОВИД-19" цар тахлын дараах дэлхийн эдийн засаг” сэдвийн дор хийгдсэн илтгэлтэй холбогдуулан Улсын Их Хурлын гишүүн Д.Цогтбаатар байр сууриа илэрхийлэв. Тэрбээр, цар тахлын үед олон талт хамтын ажиллагаа урьд өмнөхөөс илүү чухал байна. Учир нь дэлхийн улс орнуудад ажилгүйдэл нэмэгдэхийн хэрээр дотоод эдийн засгийн өсөлт буурч, хүн бүр хил нээгдэхийг тэсэн ядан хүлээж, энгийн амьдралдаа эргэн орохыг хүсч байна. Иймд олон талт худалдаа, хамтын ажиллагааг хэвийн горимд шилжүүлж, цар тахлыг хамтдаа даван туулах уриалга гаргав.


Олон улсын худалдааны асуудлаарх Ази, Номхон далайн орнуудын парламентчдын цахим семинар болж байна  
Үзсэн: 616 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй