“Таван толгой”-н ордод хөрөнгө оруулалт хийх болсон гурван компани эдийн засгийн өнөөгийн нөхцөл байдалд хамгийн сайн хувилбар гэж мэргэжилтнүүд үзэж байна. “Таван толгой”-д Монголоос “Энержи Ресурс”, Хятадын “Шэнхуа Энержи”, Японы “Сумитомо” корпораци нар консерциум байгуулан, хөрөнгө оруулалт хийх болоод байгаа юм. "Тендерт заасан нөхцлүүдийг энэ консерциум л хамгийн сайн хангасан" гэж Монголын нүүрс ассоциацийн гүйцэтгэх захирал Т.Наран ярилаа.

Хэдийгээр “Таван толгой”-н ордын хөрөнгө оруулагч шалгарсан ч гэсэн АНУ-ын “Пийбоди Энержи” компани хамтарч ажиллах санал тавьж байсан гэж тэрээр хэллээ. “Таван толгой”-д хөрөнгө оруулагчаар тодорсон консерциумын хувьд цаашдаа үйл ажиллагаа явуулахдаа бусад компанитай гэрээ байгуулж, ажлаа гүйцэтгүүлэх боломжтой. Энэ нөхцөлд АНУ-ын “Пийбоди Энержи” компани тодорхой ажлуудад гүйцэтгэгчээр оролцох эрхтэй юм байна. “Таван толгой” төсөлд дөрвөн тэрбум америк долларын хөрөнгө оруулалт шаардагдах юм.