Францын Лилль хотын их сургуулийн Хөгжим судлалын тэнхимийн профессор Алан Дежак хувийн цуглуулгадаа байсан Монголын үндэсний уламжлалт хөгжмийн зарим зэмсэг, дуу хөгжмийн пянз болон монгол дуу, хөгжмийн холбогдолтой ном товхимолыг Брюсселийн "Хөгжмийн зэмсгийн музей"-д хандивласан байна.

Түүний цуглуулгад 3 морин хуур, 2 ятга, 1 эхлэл хуур, 1 дөрвөн чихтэй хуур, 3 лимбэ шашны зан үйлийн болон бусад зэрэг нийт 37 нэр төрлийн хөгжмийн зэмсэг, Монголын хөгжмийн холбогдолтой 200 гаруй ном товхимол, хөгжмийн 2 гар бичмэл, 100 пянз, 80 диск, 70 кассет, 33 видео бичлэг, 200 гэрэл зураг байсан аж.

Морин хуур, ятгыг тус музейн үзэсгэлэнгийн танхимд байрлуулсан бол тэдгээрийн гэрэл зураг, товч танилцуулгыг уг музейн вэбсайт /www.mim.be /-ад байршуулснаас гадна бусад материал нь тус музейн "Номын сан"-д хадгалагджээ.

Профессор Алайн Дежак нь 1980-аад оноос Монгол хэл, соёлыг судалж эхэлсэн, тэр дундаа Монголын үндэсний хөгжмийн зэмсгийг ихээхэн сонирхож олон тооны судалгааны материал цуглуулсан монголч эрдэмтэн юм. Тэрбээр Улаанбаатар дахь Францын ЭСЯ-нд соёлын атташе, МУИС-д зочин багшаар ажиллаж байжээ.

Түүний Монголын үндэсний хөгжмийг судлах, гадаадад сурталчлан таниулах үйлсэд оруулсан хувь нэмрийг нь үнэлж Монгол Улсын Ерөнхийлөгчийн зарлигаар “Алтан гадас” одонгоор шагнасан байна.