Унгарын хаалгач Габор Кирали өнөөдөр түүхийг бүтээх болно. Учир нь тэрээр Европын аваргын түүхэн дэх хамгийн ахмад (40 нас, 75 хоног) тоглогч болох юм. Өмнө нь энэ амжилтыг Германы хагас хамгаалагч Лотар Матхаус (39 нас, 91 хоног) эзэмшиж байжээ.

Кирали Унгарын шигшээгийн урьдчилсан шатны 12 тоглолтын 10-т нь гараанд гарч тоглосон бөгөөд үүнд Норвегийн шигшээ багийн эсрэг Европын аваргын сүүлийн байрны төлөөх плэй-оффын хоёр тоглолтод нийлбэр дүнгээр 3-1-ээр хожиход үнэтэй хувь нэмрээ оруулсан юм.

Дасгалжуулагч Бэрнд Сторкд түүнийг Европын аварга шалгаруулах тэмцээнд оролцох 23 тоглогчийнхоо нэгээр сонгоход ямар нэгэн эргэлзээ байгаагүй болов уу. Бэрнд Сторкд “Би үргэлж нас бол миний хувьд чухал биш гэж түүнд хэлдэг. Надад тоглогч залуухан эсвэл хөгшин байх нь хамаагүй. Тэр сайн л байх ёстой. Габор бол сайн тоглогч. Мөн тэр маш сайхан энергитэй. Энэ удаагийн тэмцээнд амжилт үзүүлэхэд бидэнд тус болох болно” хэмээн ярьжээ.

 
Тус багийн тоглогч Криштиан Немет бага зэргийн булчингийн гэмтэлтэй байгаа бөгөөд магадгүй өнөөдөр бид түүнийг сэлгээний бүрэлдэхүүнд харж болзошгүй. Дасгалжуулагч Бэрнд Сторкд урд шугамандаа Тамас Пришкин болон Адам Шалай хоёрын аль нэгийг мөн туслах довтлогчдоор Балазш Дзудшак, Немет, Неманиа Николич болон Даниел Боде нараас хэнийг нь сонгож тоглуулах нь толгойны өвчин болоод байна.
 

Унгар Австритай тоглосон сүүлийн гурван тоглолтондоо хожигдоогүй. Хоёр хожиж, нэг тэнцсэн бөгөөд тэдний хамгийн сүүлийн томоохон тэмцээнд учраа таарч тоглож байсан нь тэртээ 1934 оны Дэлхийн аварга шалгаруулах тэмцээний шөвгийн наймын тоглолт юм. Энэ тоглолтод Австри 2-1-ээр хожиж байжээ. Унгарын шигшээ баг өмнө нь уг тэмцээнд ганцхан удаа хожиж байсан нь 1964 оны зургаадугаар сар. Тэд ЕАШТ-нд Данийн шигшээг 3-1-ээр хожсон. Харин бусад гурван тоглолтод хожигдож байсан түүхтэй.

Унгарын шигшээ баг урьдчилсан шатыг +2 гоолын зөрүүтэйгээр дуусгасан бөгөөд энэ нь бусад шигшээ тэмцээнд шалгарсан багуудаас хамгийн доор орох үзүүлэлт юм.

Бэлтгэсэн: У.Тэмүүжин