Энэ жил Монголын үндэсний номын сангийн 95 жилийн ой тохиож байна. Жанжин Сүхбаатарын багш Жамъян тэргүүтэй тухайн үеийн сэхээтнүүд өөрсдийн хувийн номын санг цуглуулж Монголын үндэсний номын санг байгуулж байжээ.

Анх 2000 гаруй номтой хоёр ажилтантай үйл ажиллагаагаа эхэлж байсан. Тухайн үед бичиг үсэг тайлагдсан хүн цөөхөн. Ихэнх ном төвд хэл дээр бичигдсэн байдаг байжээ. Тиймээс орчин цагийн номын санг байгуулж ард иргэдийг соён гэгээрүүлэх шаардлага нэн тэргүүний зорилт байсан байна. 

Өнөөдрийн байдлаар Монголын үндэсний номын санд 3.5 сая номыг хадгалж байна. Мөн орчин үеийн тоног төхөөрөмж шинэ системийг нэвтрүүлж байгаа талаар 95 жилийн ойн хүндэтгэлийн хурлын үеэр танилцуулж байлаа.

2014 онд УИХ-аас номын сангийн тухай хуулийг баталсан. Энэ хуулийг хэрэгжүүлж эхэлснээр номын фондыг баяжуулах, номын сангийн үйлчилгээг хүртээмжтэй болгох талаар олон эерэг үр дүн гарч байгааг албаныхан хэлж байна.

Төв номын санд Монголын болон олон улсын олон үнэт ховор бүтээл бий. Тухайлбал, нэгэн цагт бүх Хятадыг захирч байсан Манж үндэстний бичиг соёлтой байсныг батлах баримт 5000 орчим хадгалагдаж байдаг.