Гуравдугаар сард УДЭТ "Ромео, Жульетта", "Эдип хаан", "Норо", "Ноён Кихот" зэрэг дэлхийн жүжгийн зохиолын ноён оргилуудыг тайзнаа амилуулаад байгаа. Тэгвэл ирэх 27-нд тохиох "Дэлхийн театрын урлагийн өдөр"-ийг угтаж Уильям Шекспирийн "Гамлет" жүжгийг гурван удаа тавих гэж байна. Өнөөдөр 15:00 цагт "Гамлет" жүжиг хөшгөө нээнэ.   

Төрийн соёрхолт Н.Наранбаатарын найруулгаар тавьсан энэхүү жүжгийн голд дүр Гамлетад СТА С.Болд-Эрдэнэ, Офелияд жүжигчин О.Дөлгөөн нар тоглоно. Мөн Данийн ван Клавдийд МУАЖ П.Цэрэндагва, Гертрудад МУГЖ Ж.Оюундарь, Офелиягийн аав Полонийд МУГЖ Б.Жаргалсайхан, ах Лаэртэд СТА Г.Эрдэнэбилэг, Горациод СТА Г.Амгаланбаатар, Марцеллод СТА Д.Баттөмөр нар тоглоно.

Энэ жүжиг анх 1979 онд УДЭТ-ын алтан тайзнаа тавигдаж байсан түүхтэй. Харин хамгийн сүүлийн буюу энэ удаагийн тавилт нийгмийн зөрчил, бухимдал, худал хуурмаг, эс бүтэх бүхнийг өөрөөрөө, өөрийн солиорлоор илэрхийлэх Гамлетын дүрийг найруулагч Н.Наранбаатар илүү тодотгож байна. Тэрбээр "Энэ цаг үед техник технологийн хөгжил гэрлийн хурдаар хэмжихүйц хэмжээнд хүрсэн ч хүний эх язгуур гэгч зүйл алдагдаж, аливаа юм муу, сөрөг тал руугаа давамгайлж, материаллаг сонирхол ихтэй, өнгөц, хийсвэр болсон энэ цаг үед “Гамлет” жүжиг тайзнаа тавигдаж байгаа нь цагаа олсон гэж бодож байна" гэсэн юм.