Сар шинийн баяр болох гэж буйтай холбогдуулан “Ууц, хэвийн боов, цагаан идээний үнэ ямар байгааг тодруулахаар “Хүчит Шонхор” захыг зорилоо. Амралтын өдөр байсан учраас зах хөл хөдөлгөөн ихтэй байсан юм. Захын бараа бүтээгдэхүүн баяр дөхөж буй эдгээр өдрүүдэд хамгийн их борлуулагддаг гэж эхний лангууны худалдагч ярьж байв. Түүнээс цөөн асуултад хариулт авлаа.
-Танайд ууц хэдэн төгрөгөөр зарагдаж байна?
-Ууцны хувьд 80-520 мянган төгрөгийн хооронд зарагдаж байна. Том сүүлтэй бол үнэ нь нэмэгдэнэ. Жижиг сүүлтэй, туранхай ууц бол харьцангуй бага үнээр борлуулагдаж байгаа.
-Иргэдийн хувьд ууц хэр авч байгаа вэ?
-Ер нь сарын эхээр хөгшчүүдийн тэтгэвэр буухаар орлого нэмэгддэг гэж хэлж болно. Харин дараа нь төрийн байгууллагуудын цалин буух үеэр мөн гүйлгээ сайжирдаг.
-Таны хувьд ихэвчлэн хаанаас ирсэн ууц зарж байна?
-Сүхбаатар аймгийн малчдаас авсан ууцаа зарж, борлуулж байна. Хэдхэн хоногийн өмнө Сүхбаатарын хэсэг малчид бөөнөөрөө ирээд ууц, мах зэргээ бидэнд худалдчихаад явсан
-520 мянган төгрөг хүртэл үнэтэй байна гэхээр өндөр үнэ сонсогдож байна. Иргэдийн худалдан авах чадвараас хэт давсан үнэ биш үү?
-Харин ч энэ жилийн хувьд иргэд худалдан авах чадвар сайтай байна шүү дээ. Эдийн засгийн хямрал гээд л байсан бидэнд айхтар мэдэгдэхгүй л байна. Иргэд ихэвчлэн 150-250 мянган төгрөгийн хооронд зарагдаж байгаа ууцыг худалдан авч байгаа.
-Өвчүү ямар үнэтэй байна вэ?
-Өвчүүний хувьд 1 килограмм нь 7000 төгрөгөөр зарагдаж байгаа. Өвчүүг ихэвчлэн залуу гэр бүл худалдан авдаг.
Хонины ууц, үхрийн өвчүү ийм үнэтэй зарагдаж байсан бол сар шинийн идээний бас нэгэн салшгүй хэсэг болсон цагаан идээ, хэвийн боовны үнийг тандаж үзлээ.
Хэвийн боов үйлдвэрлэсэн компаниасаа шалтгаалан ширхэг нь 1500-2500 төгрөгөөр худалдаалагдаж байгаа бол ааруул килограмм нь 8000-14000 төгрөг, өрөм 6000, аарц 1500-1800 төгрөгөөр борлуулагдаж байсан юм.
Хонины ууц 80-520 мянган төгрөгөөр зарагдаж байна | ||
Үзсэн: 1852 | Mongolian National Broadcaster |
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.