МУГЖ Ш.Дэлгэржаргалын охин, МҮОНРТ-ийн нэвтрүүлэгч СТА Б.Гантигмаагийн  төрсөн эгч Б.Болормаагийн элэг шилжүүлэн суулгах мэс засалд зориулсан хандивын тоглолт хайр хайлгаж, цайлгасан дуун түрлэгээр дүүрэн байлаа.

Нэвтрүүлэгч Б.Гантигмаа эгчийнхээ донор болж Энэтхэг улс руу удахгүй зорих гэж байгаа бөгөөд түүнд шаардлагтай байгаа санхүүгийн дэмжлэгийг хоёр өдөр үргэлжлэн явагдах хандивын тоглолтын орлогоос босгох ажээ. Өчигдөр нийтийн дууны одод чуулсан бол өнөөдөр үдэш рок, попын одод Бөхийн өргөөнөө 19:00 цагт хуран чуулж залуучуудыг буяны мөрөөр дагуулах гэнэ.

Нийтийн дууны оддын тоглолтын дараа тус тоглолтыг зохион байгуулж буй нэвтрүүлэгч Б.Гантигмаагийн сэтгэгдлийг сонссон юм. Тэрээр “Өнөөдрийн хандивын тоглолт үнэхээр сайхан боллоо. Хүн бүрийн хайр сэтгэл бүхнийг хүлээж чадсан аав, ээж хоёртоо болон урлагийнхандаа баярлалаа. Тэр тусмаа урлагийн салбараар овоглож явдаг гэр бүлээрээ бахархаж байна. Биднийг ийм сайхан өндөр хэмжээнд хүндэлж, хайрлаж байгаа дуучид, үзэгчид, анги хамт олон, найз нөхөддөө маш ихээр мянгантаа талархаж байгаагаа илэрхийлмээр байна. Эгчийгээ босгож, эдгээж ирчихээд илүү сайхан үг хэлж баяртайгаар уулзахын ерөөлийг өргөе.

 

 

Харахад үнэхээр сайхан байна. Монголчууд бие биенийгээ үнэхээр хайрлаж чаддаг. Тиймээс үеийн үедээ бие биенээ хайрласаар ирсэн ард түмэн юм. Ганц бидний гэр бүлд ч гэлтгүй хэн бүхэнд халуун сэтгэлээ зориулж чаддаг сайхан сэтгэлтэй зон олон бол Монголчууд байж чаддаг” гэлээ.