Монгол Улсад зай хураагуур устгах үйлдвэр нэн шаардлагатай байгааг мэргэжилтнүүд хэлж байна. Бүх төрлийн зай хураагуур нь байгаль орчныг бохирдуулж, хөрс болон ундны усыг хордуулж, иргэдийн эрүүл мэндэд сөргөөр нөлөөлж байгааг судлаачид анхааруулсаар байгаа юм. Гэвч хэрэглээгээ дагаад өдрөөс өдөрт өсөн нэмэгдэж байгаа зай хураагуурыг устгах үйлдвэр манай улсад нэг ч байхгүйг албаныхан хэлж байна. Тиймээс ойрын хугацаанд зай хураагуур хадгалах зориулалтын агуулах, устгах үйлдвэр байгуулах шаардлагатай байгааг Налайхын барилгын материалын үйлдвэрлэл, технологийн паркийн дарга н.Батжаргал хэлж байна.

Өнгөрсөн онд л гэхэд Монгол Улс 6 сая орчим ахуйн хэрэглээний зай импортложээ. Эдгээр зай хураагуур нь эцэстээ айл, өрхийн ахуйн хогтой цуг хаягдаж, байгаль орчинд хор учруулсаар байна.