2024 оны 03 дугаар сарын 26-ны 08 цагаас 03 дугаар сарын 27-ны 08 цаг хүртэлх цаг агаарын тойм мэдээ хүргэе.

Цасны зузаан: Өнөө өглөөний цаг уурын станц, харуулын цасны зузааны мэдээгээр Увс, Архангай, Төв, Хэнтий, Дорнодын нутаг, Баян-Өлгийн өмнөд, Завханы зүүн, Баянхонгор, Хөвсгөл, Сүхбаатарын хойд хэсэг, Ховд, Булган, Сэлэнгэ, Дорноговь, Говьсүмбэрийн зарим газраар 0.0-38.0 см зузаан цасан бүрхүүл тогтсон байна. Үүнээс хамгийн их нь Увсын Сагилд 38.0 см, Түргэн, Баруунтуруунд 36.0 см, Малчин, Зүүнговь, Хяргасд 30.0-31.0 см, Давстад 28.0 см, бусад хэсгээр 0.0-19.0 см цасан бүрхүүл тогтсон байна. 

Хур тунадас: Өчигдөр өдөр Завхан, Сэлэнгэ, Төв аймгийн ихэнх нутгаар, Хөвсгөл, Архангай, Хэнтийн баруун, Увс, Баянхонгор, Дундговь, Дорнодын зарим газраар 0.0-6.0 мм цас орсон. Үүнээс хамгийн их нь Дархан-Уулын Шарын гол, Нийслэлийн Улаанбаатар хотод 5.0-6.0 мм, Төв аймгийн Баянчандмань, Тэрэлжид 4.0 мм, Завханы Цэцэн-Уул, Дархан-Уул аймгийн Дархан, Хонгорт 3.0 мм, бусад хэсгээр 0.0-2.0 мм цас орсон байна. 

Агаарын хамгийн их температур: Өчигдөр өдөр баруун аймгуудын нутгаар 1-5 хэм хүйтэрч, бусад нутгаар 1-11 хэмээр дулаарч, Увс нуур болон Дархадын хотгор, Тэс голын хөндийгөөр 3-11 хэм, Монгол-Алтай, Хөвсгөлийн уулархаг нутаг Завхан голын эх, Хүрэнбэлчир орчим, Идэр, Байдраг, Тэрэлж голын хөндийгөөр 2 хэм хүйтнээс 3 хэм дулаан, Их нууруудын хотгор, Хангайн нурууны өвөр бэл, Орхон-Сэлэнгийн сав газар, говийн бүс нутаг, Дорнод-Дарьгангийн тал нутгаар 10-17 хэм, бусад нутгаар 4-9 хэм дулаан байв.

Агаарын хамгийн бага температур: Өнгөрсөн шөнө нутгийн баруун хагаст 1-11 хэмээр хүйтэрч, бусад нутгаар 1-9 хэмээр дулаарч Увс нуур болон Дархадын хотгороор 17-22 хэм, Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Байдраг голын хөндийгөөр 9-16 хэм хүйтэн, говийн бүс нутгийн өмнөд хэсгээр 0-5 хэм дулаан, бусад нутгаар 1-8 хэм хүйтэн байв.

Cалхи: Ихэнх нутгаар секундэд 7-12 метр, Алтайн салбар уулс болон говийн бүс нутгаар секундэд 13-18 метр, түр зуур секундэд 24-26 метр хүрч ширүүсэж шороон шуурга шуурсан байна.

Улаанбаатар хот орчмоор: Өчигдөр өдөр цас ороогүй, өнгөрсөн шөнө 0.7-5.0 мм цас орсон байна. Салхи баруун өмнөөс баруун хойш эргэж секундэд 6-11 метр, зарим үед секундэд 13-15 метр хүрч ширүүссэн байна. Өчигдөр өдөр 5-7 хэм дулаан, өнгөрсөн шөнө 5-7 хэм хүйтэн байлаа.

 2024 оны 03 дугаар сарын 26-ны 20 цагаас 27-ны 08-ны цаг хүртэлх өдрүүдийн аюултай болон гамшигт үзэгдлийн тойм: 

Цасан шуурга: 26-27-нд шилжих шөнө Сэлэнгэ аймгийн нутгаар 0.3-3.0 мм цас орж, салхины дундаж хурд секундэд 10-16 метр, зарим үед секундэд 14-26 метр хүрч, цасан шуурга 3 цаг үргэлжлэн, Төв аймгийн нутгаар 0.2-4.0 мм цас, салхины дундаж хурд секундэд 12-14 метр, зарим үед секундэд 14-19 метр хүрч, цасан шуурга 3 цаг гаран үргэлжлэн цаг агаарын аюултай үзэгдэл ажиглагдсан байна.