Риогийн олимпийн 25 метрийн хийн гар бууны буудлагын төрөлд ОУХМ Ц.Мөнхзул эхний тогтоол буудлагад 30 сум буудаж, 289 оноо авч 22-т эрэмбэлэгдсэн. Харин дараагийн түргэн буудлагадаа харьцангуй өндөр буюу 580 оноо авсан ч 11-р байранд орсон юм. Ингээд “Монголын мэдээ” сувгийн сурвалжлагч Б.Отгонтуяа ОУХМ Ц.Мөнхзултай хийсэн ярилцлагыг хүргэе!

-Эхний тогтоол буудлагадаа өөрийгөө хэр буудсан гэж бодож байна вэ?

-Эхний буудлагын 30 суман дээр харьцангуй сайн буудсан ч таван суман дээр нь сэтгэлзүйн хувьд тайван байж чадсангүй гэх юмуу, санасандаа хүрч буудаж чадсангүй. 289 гэдэг бага оноо биш, гэхдээ үүнээс илүү буудах боломж байсан гэж бодож байна. Тэгээд хурдан буудлагадаа алдсан оноогоо нөхнө гэж бодож байсан ч чадсангүй. Ер нь бол 583 буудсан бол хангалтай финалд орж чадахаар байлаа.

-Бэлтгэл хэр хангасан байсан бэ. Бразилд ирээд бас бэлтгэл хийсэн байх?

-Монголдоо бэлтгэлээ “Аварга” клуб дээр хийж байсан. Техник хэрэгслийн хувьд олимпод оролцож байгаа тамирчдадаа энд байгаатай адил бууг авч өгсөн. Харин цаг агаарын хувьд Монголд байхдаа 25 метрт дандаа дотор бэлтгэлээ хийдэг байсан. Харин энд ирээд гурав хоног гадаа бэлтгэл хийсэн. Салхи ихтэй байсан учраас бодож буудах хэрэгтэйг ойлгож байсан ч өчигдөр, өнөөдөр хоёр харьцангуй тогтуун байсан.