Бүгд Найрамдах Сингапур Улсын Буудлагын холбооноос 2014 оны арванхоёрдугаар сарын 6-13-ны өдрүүдэд Сингапур хотноо зохион байгуулсан “АСЕАН-ы гишүүн орнуудын Буудлагын аварга шалгаруулах тэмцээн” болон “Сингапурын нэрэмжит буудлагын аварга шалгаруулах тэмцээн 2014”-т Монгол Улсын Буудлага спортын холбооны залуу баг тамирчид оролцож, 10 метрийн эрэгтэй хийн гар бууны төрөлд Б.Ган-Очир “Алтан медаль”, Л.Мөнх-Эрдэнэ “Мөнгөн медаль”, 10 метрийн эмэгтэй хийн гар бууны төрөлд Б.Энхжин “Хүрэл медаль”, 25 метрийн эмэгтэй спорт гар бууны төрөлд А.Ичинхорлоо “Хүрэл медаль” тус тус хүртсэн амжилт үзүүллээ.

Малайз, Монгол, Мьянмар, Тайланд, Вьетнам, Филиппин зэрэг улс орон болон БНХАУ-ын Засаг захиргааны онцгой бүс Хонгконг, Макао мөн Тайванийн нийт 12 багийн 100 гаруй мэргэн бууч хүрэлцэн ирж авхаалж, самбаа онч мэргэнээ сорин өрсөлдсөн уг тэмцээнд үлэмлэхүй амжилт үзүүлэн оролцсон Монголын буудлага спортын холбооны Б.Энхжингээр ахлуулсан зургаан тамирчинг Элчин сайд Б.Дэлгэрмаа 2014 оны арванхоёрдугаар сарын 12-ны өдөр ЭСЯ-ны байранд хүлээн авч уулзаж, амжилттай оролцсонд баяр хүргэж, гаргасан амжилтаа цаашид улам ахиулан, тив, дэлхий, олимпийн аварга болж, эх орныхоо нэрийг өндөрт өргөж явахыг ерөөн хувиасаа мөнгөн урамшууллаар мялаав.