Шууд Chart

Халдварт өвчин, уламжлалт анагаахын чиглэлээр БНХАУ-д 40 эмч суралцаад ирлээ

2018-09-18 10:48:12

Эрүүл мэндийн сайд Д.Сарангэрэл БНХАУ-ын Худалдааны яамны сургалт хариуцсан төлөөлөгчдийг хүлээн авч уулзлаа. Уулзалтын үеэр БНХАУ-ын Засгийн газрын туслалцааны хүрээнд зохион байгуулдаг сургалтад жил бүр эмч мэргэжилтнүүд хамрагдаж байгааг онцлов.

Эдгээр сургалтууд нь эмч мэргэжилтнүүдэд мэргэжлийн чиглэлээр онолын мэдлэгээ дээшлүүлэх, оношлогоо, эмчилгээний сүүлийн үеийн дэвшилтэт арга техникээс суралцах, туршлага солилцох зэрэгт ихээхэн үр дүнтэй байдаг аж. Мөн сургалтын өгөөж, гарах үр дүнг нэмэгдүүлэх үүднээс сургалтыг монгол хэл дээр явуулах хүсэлт гаргасан байна. Энэ дагуу зарим сургалтууд монгол хэл дээр зохион байгуулагдсан нь зохих үр дүнгээ өгч байгааг сайд хэллээ.

2015 онд зохион байгуулагдсан эх хүүхдийн эрүүл мэндийн чиглэлийн сургалтад 3 их эмч, 2017 онд эх хүүхдийн эрүүл мэнд, мэдрэлийн өвчин, зүрх судасны эмгэг болон сувилахуйн чиглэлээр 4 удаагийн сургалтад нийт 26 эмч, мэргэжилтэн хамрагдсан байна. Харин 2018 оны дөрөвдүгээр сард болсон халдварт өвчин, элэг цөсний эмгэгийн чиглэлийн сургалтад 25 эмч, тавдугаар сард уламжлалт анагаах ухаан, эмчилгээний чиглэлээр 5 эмч, долдугаар сард эх, хүүхдийн эрүүл мэндийн сургалтад 10 эмч тус тус хамрагдаад байгаа юм байна.

Одоогоор “Халдварт өвчний хяналт, урьдчилан сэргийлэлт, хилийн хорио цээрийн эрүүл мэндийн хяналт” сургалтад таван эмч суралцаж байгаа ба энэхүү сургалт нь есдүгээр сарын 10-30-ны өдрүүдэд үргэлжлэх юм.

БНХАУ-ын Худалдааны яамнаас зохион байгуулдаг сургалтууд нь манай улсын эрүүл мэндийн салбарын хүний нөөцийн чадавхийг бэхжүүлэхэд ихээхэн хувь нэмэр оруулж байгааг Эрүүл мэндийн сайд уулзалтын үед онцоллоо.

Нийтэлсэн: Эрүүл мэндийн яам

Халдварт өвчин, уламжлалт анагаахын чиглэлээр БНХАУ-д 40 эмч суралцаад ирлээ  
Үзсэн: 593 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй