Улаанбаатар хотод их багтаамжийн нийтийн тээврийн шинэ төрөл "BRT тусгай замтай автобус" төслийг нэвтрүүлэхээр төлөвлөж, Азийн хөгжлийн банкны санхүүжилтээр ТЭЗҮ-ийг боловсруулж Зам, тээврийн яамны Авто тээврийн дэд зөвлөлөөр хэлэлцүүллээ.

Азийн хөгжлийн банкны зөвлөх “Far East Mobilty” компаниас тусгай замын автобус зорчих коридорын харьцуулсан судалгааны "BRT тусгай замын автобус" төслийн хүрээнд урьдчилсан төлөвлөлтөөр Ард Аюушийн өргөн чөлөө - Энэбиш өргөн чөлөө - Их тойруугийн өргөн чөлөө - Намъянжүгийн гудамж - Их хүрээ гудамжуудыг холбосон нийт 12.9 км урттай 19 зогсоолтой байгуулна. Уг төслийг 2026-2030 онд хэрэгжүүлнэ.

Улаанбаатар хотод уг төсөл хэрэгжсэнээр нийтийн тээврийн үйлчилгээний хурд, найдвартай байдал нэмэгдэж, замын түгжрэл буурч, иргэдийн зорчих хугацаа багасахын зэрэгцээ агаарын бохирдол, хүлэмжийн хийн ялгарлыг бууруулахад бодит хувь нэмэр оруулна.

Төсөл хэрэгжсэнээр өдөрт 25.000-35.000 зорчиг тээвэрлэх бөгөөд замын хөдөлгөөний нэвтрүүлэх чадварыг 12.6 хувиар нэмэгдүүлнэ гэж тооцоолсон юм.