Хөнгөн атлетик:

Универсиад наадмын 9 дэх өдөр хөнгөн атлетикийн тамирчид хагас марафоны ганцаарчилсан болон багийн төрөлд уралдлаа. Ганцаарчилсан төрөлд Ц.Бямбажав 1:09:14 секундын амжилтаар шагналт 7-р байрт, Д.Гантулга 1:12:15 секундын амжилтаар 22-байрт, Н.Мөнхбаяр 1:14:29 секундын амжилтаар 27-р байрт, Б.Суврагахайрхан 1:29:27 секундын амжилтаар 40-р байрт тус тус шалгарсан бол О.Болдоо замаа дуусгаж чадалгүй хасагдсан байна. Багийн нийлбэр дүнгээр Монголын баг шагналт 4-р байранд дахин шалгарч 2015 оны БНСУ-ын Гуанжоу хотноо болсон Универсиадын амжилтаа бататгалаа. Энэ зайн тэргүүн байрт Япон улсын тамирчид шалгарсан бол ӨАБНУ, Туркийн багууд удаах байруудад шалгарчээ. 

Гольф:

Универсиад наадмын гольфийн эмэгтэйчүүдийн ганцаарчилсан төрөлд өрсөлдөж байгаа монгол улсын тамирчин А.Энэрэл тэмцээний 3 тойргийн тоглолтын дараа 101+96+94=291 оноотой, Н.Намуунаа 99+96+105=300 оноо авч нүхээ дуусгасан байна. Тамирчдын 4 тойргийн тоглолт явагдаж байхад ширүүн бороо үргэлжлэн орсон тул тэмцээний дүрмийн дагуу оноог тооцохгүйгээр тэмцээнийг зогсоожээ. 

Бильярд: 
Зуны спортын 29-р Универсиад их наадмын пүүл бильярдын төрлийн эмэгтэйчүүдийн ганцаарчилсан төрөлд Монгол улсын тамирчин, спортын мастер Баярсайханы Нарантуяа мөнгөн медаль хүртлээ. Ингэснээр тэрээр “Тайпэй-2017” Универсиад наадмаас медаль хүртсэн Монгол улсын 2 дахь тамирчин боллоо. Б.Нарантуяа шигшээ шатандаа Тайваны тамирчин Чэн Чин Ку-д 9:6-н харьцаатайгаар хожигдсон байна. Б.Уянгын хувьд хүрэл медалийн төлөө Тайваны тамирчин Зи Тин Вутай тоглож хожигдсоноор шагналт 4 дүгээр байрт шалгарлаа.

Ширээний теннис:
Энэ өдөр эрэгтэй хосын тэмцээн явагдаж Б.Өнөболд. Т.Барсболд нар шилдэг 16-д шалгарах эрхийн төлөө Австри улсын тамирчин Чен Ао Александр, Феппер Симон нартай тоглож, 33 үеийн тоглолтод :0-н харьцаатай хожигдсон. Эмэгтэй хосын төрөлд манай улсын залуу тамирчид болох Б.Урантогос, Г.Индра мөн шилдэг 16-д шалгарах эрхийн төлөө Японы хос Андо Минами, Сузуки Рика нарт 3:0-н харьцаатай хожигдсоноор хосын төрөлд өрсөлдөж байгаа монголын тамирчид тэмцээнээ дуусгаж байна.